2020年11月2日讀畢需時 2 分鐘

墨爾本年度盛事 - Melbourne Cup (墨爾本盃) 即將開跑！！

講到澳洲最具歷史性同埋最出名嘅賽馬比賽，真係不得不提一年一度嘅墨爾本盃賽事 (Melbourne Cup)🇦🇺🐴。作為世界四大賽馬節其中之一，墨爾本盃近年都有極高嘅入場人數。呢項盃賽源於1861年，至今有超過百年歷史，基本上已經成為咗墨爾本其中一項最受重視嘅活動。🤩 墨爾本盃有個十分有趣嘅稱號：「令全國停頓嘅賽事」 - The Race That Stops A Nation，意思就係喺賽事期間，每個人都會暫停佢地手上嘅工作嚟睇比賽。😎 除此之外，為咗市民能夠好好地享受呢個賽事同埋各類慶祝活動，維州政府將墨爾本盃賽馬當日定為公眾假期。🥳 墨爾本盃已經唔止係一場比賽，市內嘅慶祝活動仲會維持超過一個禮拜，由此可見呢個歷史悠久嘅盃賽有幾大影響力！正因為係公眾假期兼且係年度盛事，在場嘅每一位都會遵守一個不成文規定，就係盛裝打扮！💃🕺 不論入場嘅係觀眾定係馬主，佢哋都會專登買衫dress up去尊重場合，氣氛仲好好𠻹！以往場內仲有各種美食同埋香檳🍾️，飲飽食醉當然仲會好熱烈地投注，希望喺呢個好日子買得中冠軍馬贏返筆。💰

墨爾本盃係以嘉年華形式舉行，主要分為4日。

分別係每年11月第一個星期二舉行嘅Cup Day；
Cup Day前一個星期六嘅Derby Day；
第一個星期四嘅Kennedy Oaks Day；
以及第二個星期六嘅Stakes Day

每一日都各有特色，例如喺Derby Day當日，按照傳統入場觀眾會以黑白兩色打扮去參加所有活動；而喺Oaks Day，呢一日為嘉年華傳統嘅「女士日」，女士們都會打扮得特別隆重。👸 因為除咗賽馬比賽之外，嘉年華裡面都有一個「最佳時尚獎」嘅評審。值得注意嘅係，由於呢類活動嘅傳統正式場合裡面唔可以缺少咗帽呢個配飾，所以Oaks Day都成為咗各位女士嘅「帽子大賽」。👒

2020年嘅墨爾本盃賽將會喺嚟緊嘅星期二，即係11月3號舉行。🙌 雖然近日維州嘅疫情漸漸好轉，但係基於所有維州市民嘅健康同埋利益著想，維州嘅賽馬廳長Martin Pakula遺憾地表示政府已經決定咗今年嘅賽事唔會有現場觀眾。🥺 想睇呢個比賽嘅Roodies今年只能喺電視或者喺網上收睇。當然如果想感受盃賽現場氣氛嘅Roodies亦都可以喺下年11月嚟到墨爾本親身入場。🤝 小編知道好多去過墨爾本旅行嘅Roodies都無意錯過咗呢個年度盛事，所以等下年疫情緩和之後，各位Roodies可以考慮將呢項墨爾本傳統活動加入你地嘅澳洲旅行Plan裡面，感受一吓澳洲人嘅熱情同埋嘉年華嘅氣氛啦！🤘🏻🎊

記得Follow/Share我哋 Facebook 同 Instagram!!!

FB: https://www.facebook.com/KongarooHK

IG: @kongaroo_au

FOOD IG: @kongaroo_food