photo-of-lighted-city-buildings-during-n

澳洲八大院校知多啲 (上集) - Unimelb, Monash, Uniadel & UWA

已更新:2021年1月7日


以前講起去外國讀書留學,大家都會第一時間諗起英美兩國。但近年嚟多咗唔少香港人選擇去澳洲讀書,除咗地理位置比較靠近香港同埋時差相距較少之外,澳洲都有唔少國際知名嘅大學院校受到學生青睞。👩‍🎓🧑‍🎓👨‍🎓 相信各位Roodies講起香港都會知道三大U,咁你哋又知唔知提到澳洲U就有八大院校聯盟 (Group of Eight) 呢?為咗畀更多想去澳洲讀書嘅Roodies了解澳洲八大嘅背景,今次小編會同大家介紹八大熱門出名嘅學科、全球排名、學校環境同埋學費💰!由於資料太多,所以就分上下集畀各位Roodies慢慢了解。💡 



開始介紹前,等小編簡單介紹下八大聯盟係咩🇦🇺👇:


澳洲八大院校聯盟 (Group of Eight - Go8) ,由八間澳洲最頂尖嘅大學組成,而且都係澳洲最為歷史悠久嘅院校。無論教學水平、教師質素、學校環境同學術研究都獲得世界級認可,而且大概七成嘅學術研究文章都係經由八大撰寫!☝️值得留意嘅係八大係全球排名 top 110嘅大學,所以Go8嘅地位絕非浪得虛名!


事不宜遲,即刻同大家介紹澳洲八大嘅其中四大 - 墨爾本大學、西澳大學、蒙納士大學及阿德莱德大學:👇


墨爾本大學 (The University of Melbourne)

墨爾本大學係澳洲第二間歷史悠久嘅大學,成立於1853年。至今已經有接近五萬名學生同六千多位員工,而當中有來自一百三十個唔同國家嚟既學生,大概有一萬二千位!除此之外,大學擁有超過二十八萬位校友,遍佈世界各地!🌍 墨爾本大學喺《QS University Rankings》 2021 年世界大學評分中排名第四十一,而全澳洲排名第三。


校區及環境:

一共七個校區,Parkville為主校區,而大部分Fine Arts, Music同Dance嘅學生都喺Southbank。其他嘅校區遍佈維州各地,包括Burnley, Creswick, Dookie, Shepparton同Werribee。圖書館分佈喺校園唔同地方,基本上每一個學系都有屬於自己嘅圖書館,例如文科嘅Baillieu Library,商科嘅Giblin Eunson Library!另外,為咗培養學生嘅文化水平,大學內更設有各類型嘅博物館同美術館畀學生參觀,包括當代藝術、動物標本、解剖學等等。如果課餘時間想認識locals 或者其他地方嘅新朋友,你可以join society 成為佢哋一份子,大多都只係需要繳交入會費就可以join㗎喇。另外,如果你想做gym,學校入面有一個大型嘅收費gym room,只要你係在校生,只需AUD79一個月!



學系:

一共有十個學系,當中包括建築、樓宇規劃、藝術、商業及經濟、教育、工程、美術及音樂、法律、藥物、牙科和健康科學、科學和獸醫、以及農業科學。


出名科目及學費:


西澳大學 (The University of Western Australia)

西澳大學 (UWA) 係其中一間喺澳洲有一百多年歷史嘅大學,亦係西澳第一間興建嘅大學,成立於1911年。大學而家有接近二萬位學生,當中有五千位國際學生係嚟自一百多個唔同嘅國家。UWA 喺《QS University Rankings》 2021 年世界大學評分中排名第九十二,而全澳洲排名第七。除咗係八大聯盟嘅成員之外,亦都係十八間研究型大學嘅《Worldwide Universities Network》全球大學網絡入面嘅兩個澳洲成員之一。


校區及環境:

西澳大學有兩個校區,一個位於珀斯(Perth),一個就位於奧爾巴尼 (Albany) 。主要嘅上堂地點喺Perth,而且距離市中心只係十分鐘嘅路程。另一個吸引學生嘅地方係校園入面集娛樂、生活同美食於一身,有自己嘅剪髮舖、周末市集、牙醫診所、銀行、戶外電影院等等嘅設施,絕對可以滿足學生唔同嘅需求!如果放學想同朋友出去玩,大學附近嘅Matilda Bay自然保育區,Swan River 同海灘都一定可以滿足到你!


學系:

一共有九個學系,當中包括建築、景觀和視覺藝術、藝術、商業、教育、工程、電腦和數學、法律、醫學、牙科和健康科學、土著研究和科學。


出名科目及學費:


蒙納士大學 Monash University

大學(Monash University)成立於1958年,係八大中最大而且最年輕嘅澳洲大學。Monash University係一間國際綜合大學至今已經有接近六萬名學生,當中更有三萬名海外學生。喺《QS University Rankings》嘅 2021 年世界大學評分中,Monash University 排名全球第 五十五名。Monash University 善於培育唔同領域嘅人材,深受各界認可。Monash University係澳洲唯一一間進入世界著名醫療協會M8聯盟嘅高等學府。Monash University嘅商學院更受到EQUTIS,AACSB同埋AMBA嘅「三重認證」,成功躋身世界排名前百強。


校區及環境:

Monash University一共十個校區,克萊頓校區(Clayton Campus)為主校區,入讀要求亦係所有校區當中最高。其他嘅校區遍佈維州各地,包括Caulfield, Parkville, Peninsula, Law ChambersInternational Business School。作為名副其實嘅國際大學,除左墨爾本嘅校區外,喺南非、馬來西亞、意大利、中國同印度亦設有分校同研究中心。

Monash University除咗為學生提供娛樂,醫療,財務同埋法律協助之外,仲提供各種學校設施,好似有宿舍、銀行、郵局、gym、電影院同藝術表演中心等等,服務齊全。 學校各個校區都靠近火車站,學生有多種交通選擇,相當方便。各個校區都有圖書館,某啲學系例如Law同Pharmacy更有獨立嘅圖書館。大學有超過一百個society,可以豐富學生嘅課生活,滿足學生嘅興趣。


院系:

一共有十個院系,當中包括藝術暨設計學院文學院商學暨經濟學院教育學院工學院資訊科技學院法學院醫學護理暨健康學院藥劑學院理學院。另外Monash College設有證書及文憑課程。學校除咗正規課程多達十三科比學生選讀,仲會為有需要學生提供額外支援同課堂,令學生可以更快投入及適應大學生活。


出名科目及學費:


阿德莱德大學 (The University of Adelaide)

阿德萊德大學創校於1874年,係澳洲第三古老嘅綜合性大學。阿德萊德大學係澳洲第一間(1881年)為女性學生開啟學術大門嘅澳洲大學,比牛津大學同劍橋大學都仲要早。阿德萊德大學位於南澳州 Adelaide 市中心,相比起 Sydney 同 Melbourne,Adelaide 更有時代感同文化氣息,地理位置優越,生活成本合理。有五位諾貝爾獎獲得者都係出自呢間大學,亦有五個世界級科研中心,十九項排名都高於世界先進水平。喺《QS University Rankings》嘅 2021 年世界大學評分中,阿德萊德大學排名全球第一百零六名。阿德萊德大學課程覆蓋廣泛,提供四百幾個本科同授課型碩士課程,各學院擁有世界頂尖研究水準同埋高質量嘅教學設備。



校區及環境: 阿德萊德大學一共四個校區,大部分教學同科研工作都喺主校區 - 北台地(North Terrace)。懷特(Waite)校區同羅斯沃西(Roseworthy)校區分別位於主校區以南八公里同五十公里,主要從事農學嘅相關教學同研究。另外,澳洲國家葡萄酒中心(The National Wine Centre)亦隸屬於阿德萊德大學,係澳洲釀酒同葡萄栽培嘅教育中心之一,大學亦有開設釀酒學嘅相關課程,比學生了解澳洲嘅釀酒歷史同文化。

阿德萊德大學為學生提供保健、諮詢、語言同學習技巧輔導。大學更有超過六十個society,仲提供各種學校宿舍同大學體育館。阿德萊德大學嘅主校區 - Barr Smith圖書館係南澳最大嘅圖書館,亦係阿德萊德大學主要嘅圖書館。另外,北台地(NorthTerrace)校區仲有兩個專業圖書館:一個係Law Libraby,另一個係長者音樂圖書館(Elder Music Library)。除此之外,Waite校區同Roseworthy校區都有專業圖書館分館。


院系:

一共有五大院系,當中包括專業學院工程,計算機暨數學科學學院文學院健康暨醫學學院科學學院。另外,大學英語語言中心提供各種普通同學術英語項目,exchange項目以及針對留學生嘅英語教師培訓服務(TESOL)等。


出名科目及學費:


記得Follow/Share我哋 Facebook 同 Instagram!!!

FB:https://www.facebook.com/KongarooHK

IG:@kongaroo_au

References:


墨爾本大學科目排名

https://www.timeshighereducation.com/world-university-rankings/university-melbourne


西澳大學科目排名

https://www.timeshighereducation.com/world-university-rankings/university-western-australia


大學科目排名

https://www.topuniversities.com/node/4181/ranking-details/university-subject-rankings/2012


阿德萊德大學科目排名

https://www.topuniversities.com/node/2165/ranking-details/university-subject-rankings/2011/asian-rankings


墨爾本大學官網

https://www.unimelb.edu.au


西澳大學官網

https://www.uwa.edu.au


阿德萊德大學官網

https://www.adelaide.edu.au/


大學官網

https://www.monash.edu/


大學全球排名

https://www.topuniversities.com/university-rankings/world-university-rankings/2021

600 次查看0 則留言
Black on Transparent.png