2020年10月12日已讀 3 分鐘

【20-21年度澳洲財政預算案公布】最新移民配額大重組！

有留意開澳洲新聞嘅Roodies都應該知道上個星期二 (10月6號) 澳洲公佈咗2020-21年度聯邦預算案📑！為咗方便Roodies更快睇到呢份預算案嘅切身內容，所以小編幫大家整合咗預算案內有關移民政策改動、減稅計劃、企業補貼，以及各項醫療資源投放計劃等等嘅重點。🔍👇

移民配額計劃：

移民政策方案一直以嚟都係備受關注嘅議題，而20-21年度嘅移民政策方案就有不少嘅變動。值得注意嘅係，雖然今年移民配額總數維持不變，但當中分配畀各個簽證類別嘅移民配額就出現大重組。📣

小編先介紹今年配額增加嘅移民簽證類別喇，當中包括：

商業創新及投資計劃移民（Business Innovation and Investment (Provisional) Visa）
全球人才計劃移民（Global Talent Visa Program）
配偶簽證移民（Partner Visa）

今年商業創新及投資計劃移民 (BIIP)嘅配額幾乎係倍增，由上年嘅6,682，上升到13,500個名額。📢 商業創新及投資計劃移民，亦即係188簽證，呢個簽證係一個臨時嘅商業簽證，喺達到一定條件後可申請轉為永久居留嘅888商業創新與投資簽證。想了解更多有關188簽證嘅資料可以睇返之前嘅澳洲五年visa移民鋪路全攻略，就可以清楚知道點樣申請同有咩要注意嘅地方喇⚠️！

而今年嘅全球人才計劃移民（GTI）上升幅度就更加大，由上年嘅5,000上升咗3倍，達到15,000個名額📈。全球人才計劃移民係2019年11月推出嘅高技能移民計劃，目的係為咗吸引各類唔同領域嘅人才移民澳洲，從而鞏固澳洲嘅高科技產業地位。呢個計劃能夠提供一個快速移居澳洲嘅方法畀合資格申請人，詳情可以睇返之前一文睇清澳洲重點招攬香港人才計劃 (內含2020年優先審批17種移民職業)了解更多。🤓

另外，配偶移民配額今年都多咗一倍，由上年嘅39,799上升到72,300個名額，對於想帶配偶一齊移民嘅Roodies真係一個好消息👍👍。如果想知道有關配偶移民簽證詳情可前往配偶簽證了解更多。

方案講明移民配額維持不變，而當三大簽證配額增加咗，變相其他移民簽證類別就減少！😟 有人歡喜就有人愁🥺！配額減少嘅移民簽證類別包括：

僱主擔保（Employer Sponsored）
獨立技術（Skilled Independent）
偏遠地區（Regional）
州擔保（State/Territory Nominated）
父母移民簽證（Parent）

20-21年度最值得注意嘅係獨立技術移民簽證嘅配額繼續大幅減少，由18,652下降到只有6,500個配額。其實早喺2018-19年度嘅時候，獨立技術移民仍然有成39,137個配額咁多！由此可見，澳洲政府似乎開始想將獨立技術移民嘅配額分配去上面提過既GTI同埋BIIP。好多Roodies之前想搵僱主擔保、偏遠地區同埋州擔保簽證亦要留意☝️，今年呢3類移民配額亦同樣地有減少到。僱主擔保由上年嘅30,000個配額減至22,000個；偏遠地區就由23,000減至11,200個；而州擔保就由24,968減至少過一半，即係只有11,200個。想了解點樣申請到上述簽證同注意事項可到澳洲五年visa移民鋪路全攻略睇返！🤙

如果想帶父母去澳洲嘅Roodies要留意喇，今年父母移民簽證由上年7,371個配額減到4,500個。喺帶父母去澳洲前要更加慎重考慮同做足資料搜集。