Lockdown咗咁耐，相信各位都試過進入一種咩都唔想做又咩都唔想理嘅狀態。😞 但肚餓又唔想煮飯點算啊？咁咪叫外賣囉！💡今日就為各位Roodies帶嚟幾間餐飲外送服務嘅評測，等大家喺stage 4 lockdown 期間都可以安坐家中食餐好！
為咗方便大家，小編整理咗各平台嘅特點同埋注意事項，等Roodies可以選擇返適合自己嘅餐飲外送服務平台。 事不宜遲，即刻碌落去睇啦！👇
Uber Eats
（創建於：2014年，來自：美國）
目前Uber Eats業務已遍佈世界各地，例如香港、澳洲、新西蘭、美國等總共34個國家同城市。同大部份餐飲外送服務平台一樣，用家可以喺手機裡面嘅Uber Eats APP追蹤送餐員嘅位置，實時睇到同送餐員嘅距離。Uber Eats 用戶界面清晰易用，從未用過餐飲外送服務平台嘅Roodies都可以輕易上手。
目前Uber Eats 嘅送餐費會以餐廳同埋用家嘅距離而定，大概由AUD2.99至7.99或以上不等。部份同Uber Eats合作嘅餐廳亦會不定時推出優惠，例如消費到指定金額就會送餐廳嘅指定餐飲，Roodies都可以留意下呀！
*上圖就係McDonald (Clayton)嘅限時優惠 → 消費滿AUD25送指定餐飲。
小編評價：😋
餐廳選擇多
客戶服務良好
收費較貴
Deliveroo
（創建於：2013年，來自：英國）
Deliveroo 業務遍佈全球大約200個國家同城市（英國，香港，台灣，澳洲，新西蘭等）。同大部份餐飲外送服務平台相似，Deliveroo 同世界各地唔同嘅餐廳合作，為用家提供大量選擇。
值得Roodies注意嘅係，Deliveroo會同唔少嘅餐廳做獨家合作，所以有部份餐廳淨係喺Deliveroo APP裡面先搵到㗎咋！除此之外，Deliveroo亦都有同便利商店合作，用家仲可以喺Deliveroo APP裡面買零食𠻹。目前Deliveroo嘅送餐費會以餐廳同埋用家嘅距離而定，大約由AUD3.99至8.95或以上不等。Deliveroo亦會同餐廳合作，推出限時嘅獨家優惠。
*上圖就係其中一間同Deliveroo合作嘅獨家餐廳優惠
（用家可留意每間餐廳縮圖嘅左上角嚟分辨餐廳有冇提供優惠）
小編評價：😋
餐廳選擇多
補足Uber Eats未能覆蓋嘅餐廳
涵蓋便利商店選擇
Doordash
（創建於：2013年，來自：美國）
Doordash嘅賣點係有大量嘅優惠，包括消費至指定金額就會獲得免運費或者少量折扣（提提Roodies：可以留意返不定期推出嘅限時Promotion code嚟攞優惠！）。而最近因為疫情關係，墨爾本地區禁止所有堂食，出名提供優惠嘅Doordash今次就針對Stage 4措施，為部份餐廳嘅Pickup orders提供減免AUD5嘅折扣！（必須於8pm前落單，並須消費超過AUD20）。小編強烈建議大家可以留意返邊啲餐廳有呢啲著數優惠，慳返嚟嘅錢又夠食多餐！
*（Roodies要確保有正確輸入Promotion code落訂單到先會有優惠㗎😉）
除咗有吸引嘅優惠折扣，Doordash嘅送餐速度亦相對較快。用家仲可以喺Doordash嘅用戶介面入面知道每間餐廳喺落單之後大約需要幾耐時間先送到。雖然Doordash官方寫明送餐時間平均大約37分鐘，但部份距離用家較近嘅餐廳會有更快嘅送餐時間。以McDonald為例，下圖顯示落單後只需大約20分鐘就送到，算係相對比較快嘅送餐時間。
小編評價：😋
運費便宜
要小心其他額外收費
送餐員唔算太多
平均送餐時間：37mins
Menulog
（創建於：2006年，來自：澳洲）
Menulog覆蓋嘅中式餐廳比起同類型Delivery Apps 少，但係就勝在運費會相對上抵，大部份餐廳都只係收AUD5運費。另一個比較特別嘅地方係Menulog可以俾你睇到其他用戶對餐廳嘅文字review，並唔係只得餐廳星數。咁用戶就唔駛一邊Google，一邊又開Zomato去睇個間餐廳伏唔伏，或者有邊樣好食推介啦。
小編評價：😋
運費相對便宜
西式餐廳為主
有文字review可供參考
以下兩個餐飲外送服務平台都有中文界面，適用於唔熟悉英文嘅用家。同時客服都識講中文，所以當餐點訂單出現問題，而又需要搵客服幫手嘅時候就唔怕出現語言不通嘅情況喇。
EASI
（創建於：2014年，來自：澳洲墨爾本）
EASI 係一間華人餐飲外送服務平台，鍾意食中餐嘅Roodies相信一定有聽過佢哋個名。同以上介紹嘅餐飲外送服務平台唔同，EASI專門同大量中式餐廳合作，當中仲有啲係獨家合作𠻹，所以有唔少中式餐廳只會喺EASI APP入面搵到。獨家合作嘅餐廳好多都會提供優惠，包括消費至指定金額以上就有運費減免或折扣。（提提Roodies: 佢哋係用優惠券方式嚟提供折扣嘅，用家係需要自己喺APP入面領取（下圖附小教學），同埋記得留意優惠券嘅使用期限唔好蝕啊！
除此之外，EASI仲提供埋團購服務，例如幫你去亞洲超市買生果、蔬菜，各種肉類同埋海鮮等等。
*紅色箭嘴係最近推出嘅優惠；紅色圈分別有「百萬優惠券」同埋「簽到領券」。「百萬優惠券」就有各獨家餐廳嘅優惠券；而「簽到領券」只要喺指定時段click 入去簽到就會得到唔同種類嘅優惠券（例如通用、下午茶、宵夜優惠券等）。
小編評價：😋
大量獨家中餐 （一般獨家餐廳運費相較便宜）
大份量配送有優惠（毒L單身狗悲劇 嗚嗚嗚）
提供團購服務
收費相對較貴
服務相對一般
熊貓外賣
（創建於：2016年，來自：英國）
熊貓外賣（下稱：熊貓） 同樣為海外華人移民及留學生提供中式餐點外賣嘅餐飲外送服務平台，佢哋業務已擴展到法國、新西蘭、澳洲及美國等國家。同EASI相似，熊貓都會同好多餐廳做獨家合作，部份餐廳只能喺熊貓APP入面先搵到，而熊貓嘅獨家餐廳亦會提供各種獨家優惠。熊貓嘅用戶界面同EASI相似，但用家就唔需要自己去留意同領取最新優惠券。
*上圖用紅圈標示嘅係熊貓獨家合作餐廳；箭嘴標示嘅係限時優惠消息。
小編評價：😋
大量中餐選擇
運費相對便宜
30日超過10次訂單推薦 (VIP服務)
記得Follow/Share我哋 Facebook 同 Instagram!!!
IG:@kongaroo_au
Comments