唔知各位Roodies 最近有冇留意到澳洲政府對澳洲配偶簽證申請有更新呢？上星期澳洲聯邦預算內容提出唔少建議，其中有一項表示：澳洲👫配偶/伴侶簽證（Australian Partner Visa）申請或將會加入英語要求。所有現有居民嘅外國伴侶如果想申請配偶／伴侶簽證，就要喺獲得永久簽證之前必須通過英語測試，或者展現出學習英語嘅意願。如果呢項移民要求獲得議會批准，將會喺2021年中開始適用，咁就令到想要移民嘅人同埋移民Agent又多一個考慮啦！
雖然有部份團體認為呢項決定唔公平或者針對非西方國家嘅人，但總理Scott Morrison認為呢個計劃對移民者同澳洲都會帶嚟正面影響 。代理移民部長Alan Tudge表示呢個變化將會改善「社會凝聚力」，並確保更多移民人士能夠喺澳洲搵到工作，有關要求嘅進一步細節將會喺未來幾個月內宣布。 為咗令大家可以簡單明白內容，小編會將同大家分享一下截至目前為止所知道嘅最新資訊先！😆
新伴侶簽證要求包括啲咩？
雖然內政部現時仲未發佈有關變更同運作細節，並需要喺未來幾個月內與主要利益團體先進行磋商，但係我哋確實知道呢項要求將會要伴侶簽證申請人及其擔保人（澳洲永久居民或公民）必須具有一定嘅英語水平，又或者可以 「證明已作出相當嘅努力去積極學習英語」。📝
根據SBS News所提出，申請人可以完成 Australian Migrant English Program （AMEP）課程或者參加英語教學機構嚟證明自己已作出合理嘅努力。代理移民部長Alan Tudge上星期亦都有表示，完成500個小時嘅AMEP課程係其中一個「證明努力及學習意願」嘅一個例子。 而政府計劃下嘅教育課程都會喺每個澳洲州份同地區免費提供。
值得留意嘅係，呢項要求唔會引入於臨時伴侶簽證（Subclass 309 及820），即係話申請人嘅伴侶都可以持臨時簽證入境，但如果入咗澳洲境內，申請人嘅伴侶需要學習「澳洲嘅第一語言 - 英文」嚟符合所需申請要求嚟申請永久居留簽證。臨時同永久性伴侶簽證嘅申請通常係同時進行嘅，臨時簽證就允許申請人喺審核其永久性簽證嘅期間內可以一直停留喺澳洲，或者直到申請被撤回為止。所以就算手持臨時簽證都唔代表可以鬆懈㗎！
以上更改如果落實，將會由2021年下半年開始實施，僅適用於新嘅伴侶簽證申請人，代表住已經提交申請嘅人唔會受到影響。
根據SBS News，呢項要求都唔適用於希望將其家人帶到澳洲嘅人道主義簽證持有人。再加上喺迫不得已同埋同情心因素嘅大前提底下，申請人都可以獲得呢項要求嘅豁免，例如，有學習障礙等。
現時部分簽證已要求有一定嘅英語能力
澳洲現時嘅移民制度大致上可以分為五大類📄：
1. 🧳訪客簽證
2. 🏫學習及培訓簽證
3. 👪家庭和伴侶簽證
4. 👔工作和技術簽證
5. 🚶人道主義簽證
現時學習簽證同技術移民簽證已經要求申請人需要有一定程度嘅英語要求。
例如，培訓簽證（Subclass 407）要求申請人 - 具有基礎能力嘅英語（IELTS總分4.5分），而僱主提名計劃簽證（Subclass186）嘅申請人英語能力需要達到 - 有足夠能力勝任嘅英語（IELTS每個細項至少6分）。現時，英國、愛爾蘭、美國、加拿大同新西蘭嘅公民無需接受測試即可證明自己係English Speaker。
但係目前澳洲移民局未有對👪家庭和伴侶簽證有英語能力嘅要求，以上更新一但落實，大家就要留意申請簽證嘅新要求啦！至於要點樣達到澳洲移民局認可嘅英語能力，我哋嚟緊會有一篇詳細英文移民考試攻略！各位Roodies 一定要密切留意啊！
記得Follow/Share我哋 Facebook 同 Instagram!!!
IG: @kongaroo_au
FOOD IG: @kongaroo_food
References:
移民澳洲英語自我測試，你能做對多少？
澳洲伴侶簽證：移民新例「將加入英語測試要求」
澳洲政府移民局官網 - 簽證列表
IELTS 模擬試題
