photo-of-lighted-city-buildings-during-n

澳洲揸車知多啲: 香港車牌篇

已更新:2021年1月5日


講起澳洲大家好自然會聯想到‘Chill’, ‘Lay back’呢啲字眼。如果你問起初初去到澳洲生活嘅朋友仔,咩時候令你最快感受到呢種Aussie culture嘅話,「交通」一定榜上有名!🚃🚞🚈🚌 畢竟習慣咗香港嘅生活節奏,突然要重新適應異地,的確有好多不便。喺澳洲,我哋要習慣check好哂巴士到站時間先出門口,因為錯過一班車分分鐘要等成半個鐘。🥺 當然就算你做好準備,巴士唔出現嘅情況亦屢見不鮮。如果你住喺偏遠地區,情況就更加嚴重!(小編好明白你啊😭🙌)


想舒舒服服喺澳洲生活,基本上每個人都需要揸車代步。🚗 但係澳洲各州嘅駕駛法規都各有不同,某啲州份要求你同時持有香港車牌同國際車牌先可以上路, 亦有州份只要你持有香港車牌就足夠。☝️今日就等小編嚟詳細講解一下持有香港車牌可以點樣喺澳洲揸車同有咩注意事項喇🕵️‍♀️!下面會按州份續一解釋俾Roodies聽:👇



ACT(澳洲首都領地 Australian Capital Territory)

如果你係來訪駕駛者想喺ACT揸車,呢種情況下你並唔需要持有ACT車牌,但必須持有有效嘅國際車牌及/ 或香港車牌。


咩係來訪駕駛者❓


呢類駕駛者係到訪ACT但無意成為居民嘅人,包括:

  • 遊客;

  • 生意來;

  • 探望親朋戚友;

  • 持有工作假期簽證;

  • ACT讀書或臨時工作嘅人,並打算喺畢業或工作後返去自己原來嘅州份或國家。

如果你係持有PR或前往ACT居住嘅香港車牌持有人,就必須喺獲得ACT居住權嘅三個月內獲得ACT嘅駕駛執照。值得注意嘅係☝️,香港係ACT認可嘅地區,所以你只需要預約申請ACT車牌而無需報考任何考試。 但如果申請人未滿25歲,即使你嘅駕駛經驗得到認可,你仍然需要參加考試。



NSW(新南威爾斯州 New South Wales)

如果你持有香港車牌,只要滿足以下嘅條件,就可以無限期地喺NSW駕駛國際牌照所涵蓋嘅車輛:

  • 臨時海外訪客

  • 需攜帶有效香港車牌

  • 冇喺任何地方被取消駕駛資格


如果你係澳洲永久居民,並且打算留喺NSW,就唔會被視為訪客。 你只可以以香港車牌喺NSW駕駛最多三個月, 三個月後就需要申請NSW車牌先可以繼續駕駛。


由於香港係NSW認可嘅地區,只要預約申請NSW車牌,就無需參加任何考試。但如果申請人未滿25歲,即使你嘅駕駛經驗得到認可,你仍然需要參加考試。


喺遞交申請時,你需要預先準備好以下文件先可以轉到澳洲車牌:⚠️

  • 身份證明文件

  • 知識測試(如適用)

  • 駕駛考試(如適用)

  • 醫療報告(如適用)

  • 香港車牌


NT (北領地 Northern Territory)

你可以使用國際車牌/香港車牌喺NT駕駛最多三個月。 若果你逗留喺NT多過三個月,你嘅國際車牌/ 香港車牌就會失效。呢個時候你必須獲得NT車牌先可以繼續駕駛!☝️


由於香港係NT認可嘅地區,你只需要預約申請NT車牌,❌就無需參加任何考試。 但如果申請人未滿25歲,即使你嘅駕駛經驗得到認可,你仍然需要參加考試。



QLD (昆士蘭 Queensland)

如果你係來訪駕駛者,即可憑有效嘅國際車牌/香港車牌喺QLD駕駛。如果你係持有國際車牌/ 香港車牌嘅澳洲公民,並且已經喺QLD居住滿3個月,你就必須申請QLD車牌。但呢啲並唔包括臨時簽證,商務簽證或監護人簽證。


由於香港係QLD認可地區,你只需要預約申請QLD車牌就可豁免考試。 但如果申請人未滿25歲,即使你嘅駕駛經驗得到認可,你仍然需要參加考試。



SA (南澳 South Australia)

如果你係來訪駕駛者,只要持有臨時簽證(例如學生、工作、旅遊)就可以用國際車牌/ 香港車牌喺SA駕駛海外牌照所涵蓋嘅車輛。🚗


當然你必須滿足以下嘅條件:

  • 必須隨身攜帶護照同有效車牌

  • 有效臨時簽證

  • 有效國際車牌/香港車牌

  • 國際車牌/香港車牌未曾被暫停或取消

如果你已成為SA嘅永久居民,就必須喺九十日內獲得SA嘅車牌。 獲得SA車牌或Learner牌之後,你所持有嘅國際車牌/ 香港車牌喺SA就會無效,唔會有駕駛資格。



TAS (塔斯曼尼亞 Tasmania)

如果你係來訪駕駛者或持有臨時簽證(例如學生、工作、旅遊)或持有唔超過3個月嘅簽證,就可以用國際車牌/ 香港車牌喺TAS駕駛。 注意!喺TAS揸車時,你嘅國際車牌/ 香港車牌必須有效並喺駕駛時隨身攜帶。☝️ 如果你持有澳洲永久居留,你必須喺3個月內獲得TAS車牌。 


由於香港並唔係TAS認可嘅地區,所有駕駛者必須通過TAS嘅電腦筆試同路試先可以獲得TAS車牌正式上路。🤓



VIC (維多利亞 Victoria)

根據以往慣例,持有國際車牌/ 香港車牌可以喺VIC駕駛,直至獲發永久居留簽證為止。但一當你獲得永久居留,就必須喺六個月內換取屬於VIC嘅車牌。


但喺新交通規例下,不論係臨時簽證定學生簽證,只要計劃喺墨爾本居留六個月或以上,就必須換領本地嘅車牌。由於香港係VIC認可嘅地區,你只需要預約申請VIC車牌而無需報考任何考試。 但如果申請人未滿25歲,即使你嘅駕駛經驗得到認可,你仍然需要參加考試。🗓



WA (西澳 Western Australia)

如果你係WA嘅來訪駕駛者,只要你持有有效嘅香港車牌,你就可以駕駛被西澳許可喺海外駕駛嘅車輛。🤓


來訪駕駛者包括:

  • 商業來

  • 工作假期簽證

  • 西澳暫時工作

  • 西澳學生

  • 旅遊遊客


值得留意嘅係(喂,重點!☝️),駕駛時必須隨身攜帶有效國際車牌/ 香港車牌,而且只可以駕駛經許可喺海外駕駛嘅車輛。🚗 如果你獲得永久居民簽證,並且打算留喺WA,就唔會被視為訪客。 你只可以以香港車牌喺WA駕駛最多三個月, 三個月之後你就需要申請WA車牌先可以繼續駕駛。👌🏻


以上係小編整合嘅各州車牌要求同注意事項⚠️,如果Roodies對車牌仲有其他疑問,可以去到下面各州官網參考或查詢。疫症期間,好多政府機構未必正常運作,所以你嘅車牌會喺今年內到期嘅話就要提早準備喇!🦾


記得Follow/Share我哋 Facebook 同 Instagram!!!

FB:https://www.facebook.com/KongarooHK

IG:@kongaroo_au


References:


澳洲首都領地 Australian Capital Territory車牌官網

https://www.accesscanberra.act.gov.au/app/answers/detail/a_id/1581#!tabs-8


新南威爾斯州 New South Wales車牌官網

https://www.rms.nsw.gov.au/roads/licence/moving-to-nsw.html#Internationaldriversandriders


北領地 Northern Territory車牌官網

https://nt.gov.au/driving/driverlicence/new-to-the-northern-territory/driver-licence-rules-for-new-nt-residents-and-visiting-drivers


昆士蘭 Queensland車牌官網

https://www.qld.gov.au/transport/licensing/driver-licensing/overseas/driving


南澳 South Australia車牌官網

https://www.sa.gov.au/topics/driving-and-transport/licences/driving-with-an-overseas-licence


塔斯曼尼亞 Tasmania車牌官網

https://www.transport.tas.gov.au/licensing/interstate_or_overseas_licences


維多利亞 Victoria車牌官網

https://www.vicroads.vic.gov.au/licences/renew-replace-or-update/new-to-victoria/overseas-drivers


西澳 Western Australia車牌官網

https://www.transport.wa.gov.au/licensing/visiting-from-overseas.asp

4,623 次查看0 則留言
Black on Transparent.png